شاعری

اب جدائی کے سفرآئیں گے

قیصر عباس

اب جدائی کے سفرآئیں گے
رات ٹوٹے گی تو گھر آئیں گے

جتنے آئیں گے ثمر ان کے ہیں
اپنے حصے میں شجر آئیں گے

صبح آئے گی، ا سے آنا ہے
پہلے راتوں کے کھنڈر آئیں گے

شب گزیدہ ہیں پریشان چہرے
موسمِ گل میں نکھر آئیں گے

سارے موسم ہیں ہمارے موسم
شاخ پر پھر سے ثمر آئیں گے

مشعلیں اپنی جلائے رکھنا
قافلے اور ادھر آئیں گے

بھیگی آنکھوں پہ سجانا قیصرؔ
راہ میں جتنے بھی سرآئیں گے

Qaisar Abbas
+ posts

ڈاکٹر قیصر عباس روزنامہ جدو جہد کے مدیر اعلیٰ ہیں۔ وہ پنجاب یونیورسٹی سے ایم اے صحافت کرنے کے بعد پی ٹی وی کے نیوز پروڈیوسر رہے۔ جنرل ضیا الحق کے دور میں امریکہ منتقل ہوئے اور وہیں پی ایچ ڈی کی ڈگری مکمل کی۔ امریکہ کی کئی یونیورسٹیوں میں پروفیسر، اسسٹنٹ ڈین اور ڈائریکٹر کی حیثیت سے کام کر چکے ہیں اور آج کل سدرن میتھوڈسٹ یونیورسٹی میں ہیومن رائٹس پروگرام کے ایڈوائزر ہیں۔ وہ ’From Terrorism to Television‘ کے عنوان سے ایک کتاب کے معاون مدیر ہیں جسے معروف عالمی پبلشر روٹلج نے شائع کیا۔ میڈیا، ادبیات اور جنوبی ایشیا کے موضوعات پر ان کے مقالے اور بک چیپٹرز شائع ہوتے رہتے ہیں۔