لاہور (جدوجہد رپورٹ) بائیں بازو کے عظیم دانشور اور انقلابی رہنما ڈاکٹر لال خان (یثرب تنویر گوندل) کی پہلی برسی کے موقع پر ملک گیر تقریبات کا انعقاد کیا جا رہا ہے۔اس سلسلے میں روزنامہ جدوجہد کے زیر اہتمام ڈاکٹر لال خان کی برسی کے موقع پر خصوصی نمبر بھی شائع کیا جائے گا۔
اس کے ساتھ ہی روزنامہ جدوجہد کے پلیٹ فارم سے 19 فروری کی رات 08 بجے ویبینار کا انعقاد بھی کیا جا رہا ہے۔ اس ویبینار سے ڈاکٹر کرامت علی، ڈاکٹر فرزانہ باری، فاروق طارق، اویس قرنی، ڈاکٹر صبا گل خٹک، آصف علوی، ڈاکٹر ثاقب عباسی اور دیگر خطاب کریں گے۔
کراچی میں 21 فروری بروز اتوار ڈاکٹر لال خان کی برسی کے سلسلے میں سندھ بھر کی مرکزی تقریب کا انعقاد کیا جا رہا ہے۔ اس تقریب میں رواں سال فوت ہونے والے انقلابی ساتھیوں کامریڈ انجینئر نتھو مل (حیدرآباد)، کامریڈ امجد شاہسوار (کشمیر)، کامریڈ حیدر عباس گردیزی (ملتان)، کامریڈ احمد وارثی (کراچی)، کامریڈ زبیر جارا (سیالکوٹ)، کامریڈ دیوا (حیدرآباد)، کامریڈ کھبڑ خان سلیرو (شہداد کوٹ) اور کامریڈ عثمان مرزا (کراچی) کی جدوجہد کو بھی خراج عقیدت پیش کیا جائے گا۔
کراچی میں ڈاکٹر لال خان کی برسی کی تقریب آڈیٹوریم آرٹس کونسل آف پاکستان میں اتوار 21 فروری کو 2 بجے منعقد کی جائیگی۔ اس تقریب سے سینیٹر ڈاکٹر کریم خواجہ (مرکزی صدر پیپلز ڈاکٹر فورم)، ڈاکٹرریاض احمد شیخ (ڈین سوشل سائنسز)، شیما کرمانی (معروف آرٹسٹ و بانی تحریک نسواں)، مظہر عباس (سینئر صحافی و کالم نگار)، ڈاکٹرونود مل (رہنما بی این ٹی)، جواد احمد (چیئرمین برابری پارٹی پاکستان)، محمد احمد شاہ (صدر آرٹس کونسل)، عبدالعزیز میمن (سابق وفاقی وزیر)، ایوب قریشی (نائب صدر نیشنل پارٹی)، مہناز رحمان (ڈائریکٹر عورت فاؤنڈیشن)، ڈاکٹر سید جعفر احمد (ڈائریکٹر انسٹیٹیوٹ آف ہسٹاریکل اینڈ سوشل ریسرچ)، انیس ہارون (ممبر نیشنل کمیشن آف ہیومن رائٹس)، نجم الحسن عطا (سینئر صحافی و تجزیہ نگار)، قمر الزمان خان (مرکزی صدر پی ٹی یو ڈی سی)، اویس قرنی (مرکزی آرگنائزر آر یس ایف)، کرامت علی (جنرل سیکرٹری نیشنل لیبر کونسل)، اختر حسین ایڈووکیٹ (عوامی ورکرز پارٹی)، عمران کامیانہ (پی ٹی یو ڈی سی)، انور پنہور (صدر پی ٹی یو ڈی سی سندھ)، ساشا جاوید ملک (صحافی)، حمید خان (صوبائی صدر پروفیسراینڈ لیکچررز ایسوسی ایشن بلوچستان) سمیت دیگر مقررین خطاب کرینگے۔
پاکستان کے وفاقی دارالحکومت میں نیشنل پریس کلب اسلام آباد میں 28 فروری کو برسی کی تقریب منعقد کی جائیگی۔ اس تقریب سے بھی راولپنڈی اسلام آباد سمیت ملک بھر سے بائیں بازو کے رہنما اور طلبہ قائدین خطاب کرینگے۔
اس کے علاوہ بلوچستان، خیبر پختونخوا، جنوبی پنجاب اور کشمیر سمیت دیگر مختلف مقامات پر بھی برسی کی تقریبات کا انعقاد کیا جائے گا۔
