شاعری

کل میرا ہے!

قیصر عباس

جن کے لہجے میں خدائی کا غرور
ان کے کھیتوں پہ حکومت میری
جن کے ہونٹوں پہ مری تعزیریں
ان کے کھلیان میں محنت میری

لوگ میرے ہیں سیاست ان کی
بستیاں ان کی گوالے میرے
نیند ان کی ہے تو سپنا میرا
تیرگی ان کی اجالے میرے

نقش پا ان کے قدم میرا ہے
سنگِ میل ان کے سفر میرے ہیں
یہ زمیں میری ہے گھر میرا ہے
میری مٹی کے کھنڈر میرے ہیں

ان کی جاگیر ہے میرے دم سے
فصل ان کی ہے تو ہل میراہے
ان کی تاریخ ہے میرے دم سے
آج ان کی ہے تو کل میرا ہے

Qaisar Abbas
+ posts

ڈاکٹر قیصر عباس روزنامہ جدو جہد کے مدیر اعلیٰ ہیں۔ وہ پنجاب یونیورسٹی سے ایم اے صحافت کرنے کے بعد پی ٹی وی کے نیوز پروڈیوسر رہے۔ جنرل ضیا الحق کے دور میں امریکہ منتقل ہوئے اور وہیں پی ایچ ڈی کی ڈگری مکمل کی۔ امریکہ کی کئی یونیورسٹیوں میں پروفیسر، اسسٹنٹ ڈین اور ڈائریکٹر کی حیثیت سے کام کر چکے ہیں اور آج کل سدرن میتھوڈسٹ یونیورسٹی میں ہیومن رائٹس پروگرام کے ایڈوائزر ہیں۔ وہ ’From Terrorism to Television‘ کے عنوان سے ایک کتاب کے معاون مدیر ہیں جسے معروف عالمی پبلشر روٹلج نے شائع کیا۔ میڈیا، ادبیات اور جنوبی ایشیا کے موضوعات پر ان کے مقالے اور بک چیپٹرز شائع ہوتے رہتے ہیں۔