لاہور (جدوجہد رپورٹ) جنوب مشرقی تھائی لینڈ کی اصلاح پسند اپوزیشن نے عام انتخابات میں سب سے زیادہ نشستیں حاصل کر کے ایک دہائی سے زائد عرصہ سے اقتدار میں رہنے والی فوج کی حمایت یافتہ جماعتوں کو شکست دی ہے۔
’الجزیرہ‘ کے مطابق پیر کو تقریباً تمام ووٹوں کی گنتی کے ساتھ پروگریسیو مووفارورڈ پارٹی (ایم ایف پی) اور پاپولسٹ فو تھائی پارٹی کے 500 رکنی ایوان نمائندگان میں 286 نشستیں جیتنے کا امکان ہے۔
تاہم صورتحال ابھی غیر یقینی ہے کہ آیا وہ خصوصی پارلیمانی قوانین کی وجہ سے اگلی حکومت تشکیل دے پائیں گے یا نہیں۔ ان قوانین کے تحت فوج کی طرف سے مقرر کردہ سینیٹ کے 250 اراکین بھی وزیراعظم کے انتخاب کیلئے ووٹ دے سکتے ہیں۔
اس کا مطلب ہے کہ ایم ایف پی اور فو تھائی کوحکومت قائم کرنے کیلئے چھوٹی جماعتوں کی حمایت کی ضرورت ہوگی۔
اتوار کے ووٹ میں سب سے بڑی فتح ایم ایف پی کو حاصل ہوئی، جو ایک ترقی پسند نوجوانوں کی قیادت والی جماعت تھی۔ ایم ایف پی نے پہلی بار بادشاہت میں اصلاحات لانے اور ملک کے آئین کو دوبارہ لکھ کر اور بھرتی ختم کر کے فوج کی طاقت کو کم کرنے کے جرات مندانہ پروگرام پر عام انتخابات میں حصہ لیا۔
99 فیصد ووٹوں کی گنتی کے ساتھ ایم ایف پی کل 147 نشستوں کے ساتھ ایوان زیریں کی سب سے بڑی جماعت بنتی نظر آرہی ہے۔
تجزیہ کاروں نے ایم ایف پی کے نتائج کو شاندار قرار دیا ہے، کیونکہ انتخابات سے پہلے سروے میں پیش گوئی تھی کہ فو تھائی کو اس طرح کے نتائج ملیں گے۔
تازہ ترین نتائج کے مطابق فو تھائی پارٹی نے کل 138 نشستیں جیتی ہیں۔
وزیراعظم پریوتھ چان اوچا کی یونائیٹڈ تھائی نیشن پارٹی 36 نشستوں کے ساتھ پانچویں نمبر پر ہے۔ پریوتھ چان اوچا نے 2014ء کی بغاوت میں آرمی چیف کے طور پر اقتدار پر قبضہ کیا تھا۔ ان کی سابقہ پارٹی پالنگ پرچارتھ تقریباً40 نشستوں کے ساتھ چوتھے نمبر پر تھی۔
تیسرے نمبر پر بھومجائی تھائی پارٹی تھی، جس نے تھائی لینڈ میں بھنگ کو قانونی حیثیت دینے کی مہم کی قیادت کی۔ موجودہ حکمران اتحاد کا حصہ بھومجائی تھائی کو تقریباً 70 نشستیں جیتنے کا اندازہ تھا۔
ایم ایف پی کے زبردست نتائج کے باوجود تجزیہ کاروں کا کہنا ہے کہ اسے بنکاک کے گورنمنٹ ہاؤس کیلئے ایک مشکل جنگ کا سامنا ہے۔ اس کی وجہ یہ ہے کہ کسی بھی جیتنے والے امیدوار کو وزیراعظم بننے کیلئے ایوان نمائندگان اور سینیٹ میں 376 ووٹ درکار ہونگے۔
2019ء کے آخری انتخابات میں بھی سینیٹ نے پریوتھ چان کو متفقہ طور پر ووٹ دیا، حالانکہ انتخابات میں فوتھائی پارٹی کے پاس ایوان نمائندگان میں اکثریت تھی۔ وزیراعظم بعد میں 19 مختلف جماعتوں کے اتحاد کو اکٹھا کرنے میں کامیاب رہے، جس نے انہیں 4 سال تک اپنے عہدے پر برقرار رکھا۔
ایم ایف پی کیلئے اہم نکات بادشاہت اور مسلح افواج میں اصلاحات کے وعدے ہیں، جس میں تھائی لینڈ کے سخت گیر قوانین میں ترمیم بھی شامل ہے۔ مبہم الفاظ والے آرٹیکل 112 میں 15 سال تک قید کی سزا ہے، جس کے بارے میں حقوق گروپوں کا کہنا ہے کہ اسے سیاسی کارکنوں کو سزائیں دینے کیلئے استعمال کیا گیا ہے۔
تاہم اگر سینیٹ ایم ایف پی کی مخالفت کرتی ہے تو اسے فیو تھائی اور دیگر چھوٹی جماعتوں کی حمایت کی ضرورت ہوگی، جیسے بھومجائی تھائی، جس کی قیادت موجودہ وزیر صحت انوتین چرنویرا کول کر رہے ہیں۔
تاہم اس سب کا مطلب ہے کہ تھائی ووٹروں کو یہ معلوم کرنے میں ہفتوں لگ سکتے ہیں کہ ان کی نئی حکومت کیسی ہو سکتی ہے۔
