حاشیہ ہائے بابِ شکست

طارق علی

(طارق علی کی کتاب’بنیاد پرستیوں کا تصادم‘2023میں شائع ہوئی۔ اس کا ترجمہ درجن بھر زبانوں میں ہوا۔ مسلم دنیا اور سامراج بارے اس کتاب کا اردو ترجمہ فاروق سلہریا نے کیا۔ اس کتاب کا فلسطین بارے ایک باب غزہ میں جاری تازہ اسرائیلی حملے کے پس منظر میں قارئین کی دلچسپی کیلئے پیش کیا جا رہا ہے۔)

1948ء کی نکبۃ کے ہاتھوں فلسطینی قیادت سے محروم ہوگئے اور بکھر کر رہ گئے۔ ان کی زندگیاں صحیح معنوں میں عرب ریاستوں کی کڑی نگرانی میں آگئیں۔ فلسطین محاذ آزادی (پی ایل او) کے قیام پر اتفاق رائے کے لئے عرب لیگ نے پندرہ سال لگا دیئے لیکن پی ایل او کا مطلب یہ تھا کہ فلسطینی دستے بنائے جائیں جو شام، عراق، اردن اور مصر کی فوجوں اندر مد غم ہو جائیں۔ عرب دارالحکومتوں اندر 1956ء کے واقعات اور ان کے نتیجے میں جنم لینے والی پولرائزیشن سے متاثر ہوکر ریڈیکل نظریات رکھنے والی نئی فلسطینی نسل اندر ایک نیا شعور جنم لے رہا تھا۔ یہ ایسے نوجوان مرد و خواتین تھے جو 1948 میں ابھی اپنے پیروں چلنا سیکھ رہے تھے او ر اس دور کی نسلی صفائی کا براہ راست تجربہ انہیں بھول چکا تھا۔ یہ وہ نسل تھی جو بربادیوں کی داستان سنتے ہوئے پلی بڑھی تھی اور انکی یاداشت مشترکہ تھی جو شکست کے براہ راست تجربے کی نسبت زیادہ کار گر ہوتی ہے۔

باقی عرب دنیا کی طرح فلسطینی بھی قوم پرستوں اور مارکیسوں میں منقسم تھے البتہ باقی عرب دنیا کے برعکس مذہبی دھارے بہت کمزور تھے۔ یہ وہ دور ہے جب الفتح نے جنم لیا اور اس کے بائیں جانب کھڑا تھا پاپولر فرنٹ فار لبریشن آف فلسطین (پی ایف ایل پی) بعد ازاں پاپولر ڈیموکریٹک فرنٹ فار لبریشن آف فلسطین (پی ڈی ایف ایل پی)۔ اختلافات حکمت عملی کے حوالے سے تھے: الفتح اسرائیل کے خلاف فلسطینی گوریلوں کے براہ راست حملوں کے حق میں تھا، اس کے حریف یہ دلیل دیتے تھے کہ فلسطین کا حصول جب تک ممکن نہیں جب تک عرب ممالک میں سوشلسٹ انقلاب نہیں آتے۔

1965 ء میں الفتح گوریلوں نے شامی بعث کی پشت پناہی کے ساتھ اسرائیل اندر کاروائیاں شروع کر دیں۔ صیہونی رہنماؤں نے جارحانہ ردعمل کا فیصلہ کیا۔ امریکہ اور مغربی جرمنی سے ملنے والی معاشی و فوجی امداد (بشمول کیمیائی ہتھیاروں کے) نے اسرائیل کو اس قابل بنا دیا کہ اس کے پاس خطے کی طاقتور ترین فضائیہ تھی۔آبادی میں جو اضافہ ہوا تو فوج کا حجم بھی بڑھ گیاتھا۔ اعلیٰ سطحی اسرائیلی قیادت کو یقین تھا کہ وہ اسرائیل کے وجود کو خطرے میں ڈالے بغیر باقی فلسطین پر بھی قبضہ کر سکتے ہیں۔ شام، مصر اور اردن نے ایک فوجی معاہدہ کیا جس میں طے پایا کہ وہ ایک دوسرے کے علاقے کا دفاع کریں گے۔

5جون 1967ء کو اسرائیل نے مصر پر حملہ کر دیا اور اس کی فضائیہ تباہ کرکے رکھ دی۔ چھ دن کے اندر اندر اسرائیلی زرہ بکتر اردن سے یروشلم اور مغربی کنارہ چھین چکے تھے، جنوبی شام میں گولان کی پہاڑیوں پر قابض ہو چکے تھے جب کہ مصر اندر وہ نہر سویز تک سینائی پر قبضہ کر چکے تھے۔ یہ ایک بھرپور شکست تھی، نکبتہ ثانی، اور اس کے بہت ہی دور رس اثرات مرتب ہوئے۔

سقوط یروشلم ہو چکاتھا۔مسلمانوں اور عیسائیوں کے بعض مقدس ترین مقامات اب یہودیوں کے قبضے میں تھے۔ اسرائیل کی فوجی صلاحیتوں کا پینٹاگون اور سٹیٹ ڈیپارٹمنٹ پر زبردست اثر ہوا۔ صیہونی ذات اس خطے میں ان کی سوچوں سے بڑھ کر مستحکم اور مضبوط چوکی ثابت ہوئی۔ اسرائیل— امریکہ تعلقات میں ایک ڈرامائی تبدیلی آئی۔ اسرائیل خطے میں امریکہ کا قابل اعتماد ترین اتحادی بن گیا اور اس کی تصدیق اس بات سے بھی ہوتی ہے کہ امریکہ کی یہودی آبادی بڑے پیمانے پر اسرائیل کی حامی بن گئی۔

اور فلسطینی؟ اسرائیل کے قبضے کا مطلب تھا کہ آخری فلسطینی برج…… یروشلم، غزہ اور مغربی کنارہ…… بھی اب تل ابیب کے براہ راست قبضے میں تھے۔ برق رفتار فتح حاصل کرنے کے بعد اسرائیلی حکومت کے لئے ممکن تھا کہ وہ آزاد فلسطین پر مبنی حل پیش کرتی مگر وہ تو فتح کے نشے میں دھت تھے۔ دھچکے کے مارے عرب ممالک کا ردعمل یہ تھا کہ انہوں نے قبضے کو تسلیم کرنے سے انکار کر دیا۔ فلسطینیوں کی ایک بڑی تعداد شام اور اردن میں راتوں رات بنائے گئے مہاجر کیمپوں میں منتقل ہوگئی۔

1967ء کی جنگ سے ناصر ازم کا مشرق وسطیٰ میں بطور مقبول عام سامراج مخالف قوت خاتمہ ہوگیا۔ مصر کا رد عمل کیا ہونا چاہئے تھا؟ 9جون 1967 ء جب پوری عرب دنیا کو یہ اندازہ ہوا کہ کس بڑے پیمانے کی تباہی ہوئی ہے تو اخوان المسلمین سے متاثر گروہوں نے سویت سفارت خانے کا رُخ کیا۔ وہ تباہی کی ذمہ داری ماسکوپر ڈال رہے تھے۔ سویت سفارت خانے کو نذر آتش کرکے اسے بحالی کا آغاز سمجھا گیا۔ پرانی حکمران اشرافیہ کے ارکان نے کوئی وقت ضائع نہیں کیا۔وہ اعلیٰ فوجی افسروں سے مل کر سازشیں تیار کرنے لگے۔ دو سال قبل انڈونیشا کی فوج نے بائیں بازو کو شکست دینے کے لئے پورا ماحول تیار کیا تھا۔ غیر کمیونسٹ دنیا کی سب سے بڑی کمیونسٹ پارٹی کو صفحہئ ہستی سے مٹا دیاگیا تھا۔دس لاکھ لوگ مارے گئے تھے۔ اس واقعے پر اسلام پر ستوں اور پوری تیسری دنیا اندر امریکہ کی مقامی ایجنسیوں نے بغلیں بجائی تھیں۔ قاہرہ اندر اخوان المسلمین بدلے کاخواب دیکھ رہی تھی۔ اب وقت آگیا تھا کہ فرعون کاتختہ الٹ کر اس کے حامیوں کوتہ تیغ کر دیا جائے۔ وہ گروہ جو زیادہ روایتی دایاں بازو تھے وہ تو’سوشلزم کے پندرہ سال‘ واپس پلٹ دینا چاہتے تھے۔ انہیں معلوم تھا مغرب سرمائے سے ان کی پشت پناہی کرے گا تاکہ تیل کو پھر سے ’محفوظ‘ بنایا جاسکے، مصر کو واپس لوٹایا جا سکے او رپھر شام اور عراق کو سزا دی جا سکے تا آنکہ وہ راہِ راست پر آ جائیں۔