لاہور (جدوجہد رپورٹ) اقوام متحدہ کی رپورٹ میں افغان طالبان اور ٹی ٹی پی (تحریک طالبان پاکستان) کے درمیان مضبوط روابط کا تذکرہ کیا گیا ہے اور یہ بھی کہا گیا ہے کہ ٹی ٹی پی افغان طالبان کی حمایت سے پاکستان پر حملے کر رہی ہے۔
’ڈان‘ کے مطابق اقوام متحدہ کی طرف سے شائع کردہ رپورٹ میں کہا گیا ہے کہ افغان طالبان اور دیگر عسکری تنظیموں القاعدہ اور تحریک طالبان پاکستان (ٹی ٹی پی) کے درمیان تعلق بدستور موجود اور مضبوط بھی ہے۔
اقوام متحدہ کی سلامتی کونسل کی طالبان سینکشنز کمیٹی کی 14 ویں رپورٹ جمعہ کو جاری کی گئی تھی۔ رپورٹ کے مطابق دہشت گرد گروہوں کی ایک حد کو طالبان کے حقیقی حکام کی جانب سے چالبازیوں کی زیادہ آزادی ہے۔
رپورٹ کے مطابق وہ ان آزادیوں کا اچھا استعمال کر رہے ہیں اور افغانستان اور خطے میں دہشت گردی کا خطرہ بڑھ رہا ہے۔ رپورٹ میں کہا گیا ہے کہ طالبان فورسز نے عمومی طور پر داعش کے خلاف کارروائیاں کی ہیں، لیکن انہوں نے امریکہ اور طالبان کے درمیان افغانستان میں امن قائم کرنے کے معاہدے کے تحت انسداد دہشت گردی کی دفعات کو پورا نہیں کیا ہے۔
رپورٹ کے مطابق ایسے اشارے مل رہے ہیں کہ القاعدہ آپریشنل صلاحیت کو از سر نو تعمیر کر رہی ہے، ٹی ٹی پی طالبان کی حمایت سے پاکستان میں حملے کر رہی ہے، غیر ملکی دہشت گرد جنگجوؤں کے گروپ افغانستان کی سرحدوں کے پار خطرہ پیدا کر رہے ہیں اور داعش کی کارروائیاں مزید پیچیدہ اور مہلک ہو رہی ہیں۔
تاہم افغان طالبان نے اس رپورٹ کو مسترد کرتے ہوئے اسے تعصب سے بھرپور قرار دیا ہے۔
