لاہور(جدوجہد رپورٹ) رواں مالی سال کے پہلے7ماہ کے دوران درآمدات اور برآمدات میں اضافہ ہوا اور ساتھ ہی تجارتی خسارے میں بھی اضافہ ہو گیا ہے۔
ادارہ شماریات کے تجارتی اعداد و شمار کے مطابق سالانہ بنیادوں پر برآمدات میں 4.59فیصد اور ماہانہ0.31فیصد اضافہ ہوا ہے۔ رواں مالی سال کے پہلے 7ماہ میں برآمدات9.98فیصد بڑھ کر 19ارب55کروڑ 10لاکھ ڈالرز رہیں۔ دوسری جانب انہی 7ماہ کے دوران درآمدات میں 6.95فیصد اضافہ ہوا اور مجموعی حجم 33ارب ڈالر سے تجاوز کر گیا۔
اعداد و شمار کے مطابق جنوری میں سالانہ بنیادوں پر تجارتی خسارہ17.78فیصد بڑھ گیا ہے، جبکہ ماہانہ بنیادوں پر تجارتی خسارہ5.47فیصد کم ہوا ہے، جس کے بعد اس کا حجم 2ارب 31کروڑ 30لاکھ ڈالرز ریکارڈ کیا گیا ہے۔
تاہم رواں مالی سال کے ابتدائی 7ماہ کے دوران تجارتی خسارہ2.84فیصد اضافے کے بعد13ارب 48کروڑ80لاکھ ڈالرز تک پہنچ گیا ہے۔
