قیصر عباس
دریا بھی وہی، پیاس کا امکاں بھی وہی ہے
موسم بھی وہی، دشت کا داماں بھی وہی ہے
بدلے ہیں کتابوں کے سرورق ہی یارو
ورنہ تو ہر اک باب کا عنواں بھی وہی ہے
چہرے ہی توبدلے ہیں مہ و سال میں اپنے
وحشت بھی وہی، رنج کا ساماں بھی وہی ہے
لفظوں کی وہی کاٹ، وہی طرز ادا ہے
لکھی ہوئی تقریر کا عنواں بھی وہی ہے
احباب کے تیور ہی تو بدلے ہیں وگرنہ
اک عمرہوئی حلقہ یاراں بھی وہی ہے
قیصرؔ نہیں بدلے ہیں شب و روز ہمارے
منصف بھی وہی، وقت کا یزداں بھی وہی ہے
Qaisar Abbas
ڈاکٹر قیصر عباس روزنامہ جدو جہد کے مدیر اعلیٰ ہیں۔ وہ پنجاب یونیورسٹی سے ایم اے صحافت کرنے کے بعد پی ٹی وی کے نیوز پروڈیوسر رہے۔ جنرل ضیا الحق کے دور میں امریکہ منتقل ہوئے اور وہیں پی ایچ ڈی کی ڈگری مکمل کی۔ امریکہ کی کئی یونیورسٹیوں میں پروفیسر، اسسٹنٹ ڈین اور ڈائریکٹر کی حیثیت سے کام کر چکے ہیں اور آج کل سدرن میتھوڈسٹ یونیورسٹی میں ہیومن رائٹس پروگرام کے ایڈوائزر ہیں۔ وہ ’From Terrorism to Television‘ کے عنوان سے ایک کتاب کے معاون مدیر ہیں جسے معروف عالمی پبلشر روٹلج نے شائع کیا۔ میڈیا، ادبیات اور جنوبی ایشیا کے موضوعات پر ان کے مقالے اور بک چیپٹرز شائع ہوتے رہتے ہیں۔