فیض احمد فیض
فیض احمد فیض کی مندرجہ ذیل پنجابی نظم بعنوان ”میری ڈولی شوہ دریا“ 1974ء میں آنے والے سیلاب کے متاثرین کے لئے امدادی فنڈ اکٹھا کرنے کے لئے لکھی گئی: مدیر
کل تائیں سانوں بابلا
تو رکھّیا ہِک نال لا
سَت خیراں ساڈیاں منگیاں
جد جھْلّی تتّی وا
اَج کیکن ویہڑیوں ٹوریا
کویں لاہے نی میرے چاء
میرے گہنے نیل ہتھ پیر دے
میری ڈولی شوہ دریا
اَج لتھّے سارے چاء
میری ڈولی شوہ دریا
نال رْہڑدیاں رْڑھ گیاں سدّھراں
نال روندیاں رْل گئے نیر
نال ہْونج ہْونج کے لَے گئے
میرے ہتھ دی لیکھ لکیر
میری چْنّی بک سواہ دی
میرا چولا لِیر و لِیر
لج پالن بَوہڑے بھین دی
کوئی کرماں والے وِیر
میرے کرماں والے وِیر
میرا چولا لِیر و لِیر
میرے لتّھے سارے چاء
میری ڈولی شوہ دریا
سسّی مر کے جنتن ہو گئی
میں تر کے اَوتر حال
سْن ہاڑے اِس مسکین دے
ربّا پورا کر سوال
میری جھوک وَسّے، میرا ویر وَسّے
فیر تیری رحمت نال
کوئی پْورا کرے سوال ربّا
تیری رحمت نال
میرے لتّھے سارے چاء
میری ڈولی شوہ دریا
