پشاور میں خون کی ہولی کا ذمہ دار کون؟

محمد تقی

میرے آبائی شہر پشاور کو اس ہفتے کے شروع میں ایک بار پھر بے گناہوں کے خون میں رنگ دیا گیا۔

پولیس لائنز کے اندر ایک پرہجوم مسجد میں جیسے ہی دوپہر کی نماز شروع ہوئی تھی، ایک خودکش بمبار نے خود کو اڑا لیا۔ 100 سے زائد جوانوں، افسران اور شہریوں کو ہلاک کر دیا گیا۔ مارے جانے والے بہت سے افراد کی اجتماعی نماز جنازہ اسی میدان کے قریب ادا کی گئی، جہاں میں نے ایک بار صوبائی اور قومی ہاکی کے ستاروں کو باوقار پولیس گولڈ کپ کے لیے مقابلہ کرتے ہوئے اور ڈچ فل بیک پال لٹجین جیسے بین الاقوامی عظیم کھلاڑیوں کو پشاور کی ٹیم کے خلاف کھیلتے ہوئے دیکھا تھا۔

ایک زمانے کے پرسکون ماحول کو نشانات کی قطاروں اور جھنڈے سے لپٹے تابوتوں سے ڈھکے ہوئے دیکھنا دل کو دہلا دینے والا لمحہ تھا۔ خود پولیس لائنز کا نام ایک بڑے معزز سابق پولیس سربراہ ملک سعد کے نام پر رکھا گیا ہے۔ وہ جنوری 2007ء میں ایک بم حملے میں مارے گئے تھے، جو پشاور شہر میں میرے گھر سے محض دو منٹ کی دوری پر ہے۔

اس حملے میں ہم نے ایک درجن سے زیادہ دوستوں اور جاننے والوں کو کھو دیا تھا، جن میں ایک بہت ہی پیارا مقامی پولیس ڈپٹی خان رازق بھی شامل تھا۔ ایسا لگتا ہے کہ پندرہ سال بعد بھی کچھ نہیں بدلا۔ عام لوگوں کے ساتھ ساتھ، خیبرپختونخواہ (کے پی) کی صوبائی پولیس وہ ہے جس نے حقیقی معنوں میں جہادی دہشت گردی کا خمیازہ اٹھایا ہے۔

موجودہ حملے کی ذمہ داری ابتدا میں تحریک طالبان پاکستان (ٹی ٹی پی) نے قبول کی تھی، لیکن بعد میں دہشت گرد تنظیم نے خود کو بم دھماکے سے الگ کر لیا۔ تاہم، اس کے ساتھ ملحق ایک گروہ نے بعد میں اس گھناؤنے فعل کی ذمہ داری قبول کی۔ کے پی پولیس کو مبصرین اور حکام نے اپنے ہیڈ کوارٹر کو محفوظ بنانے میں ناکامی کے لیے جلدی میں مورد الزام ٹھہرایا، خاص طور پر چونکہ یہ صوبائی سول سیکرٹریٹ، پشاور ہائی کورٹ اور دیگر سرکاری عمارتوں کے بالکل قریب واقع ہے۔

صوبائی پولیس سربراہ نے اپنے محکمے کی جانب سے حملے کو روکنے یا حملہ آور کو روکنے میں ناکامی کی ذمہ داری قبول کی ہے، جس کے بارے میں کہا جاتا ہے کہ وہ پولیس کی وردی پہنے ہوئے تھا۔ اعلیٰ پولیس اہلکار نے اشارہ کیا ہے کہ ہوسکتا ہے کہ حملہ آور کے ساتھیوں کو حملے سے کئی دن پہلے دھماکہ خیز مواد کے ٹکڑے لانے کے لیے احاطے تک رسائی حاصل ہوئی ہو۔ نوآبادیاتی دور کی پولیس لائنیں 1880ء کی دہائی میں کہیں تعمیر کی گئی تھیں اور ایک وسیع و عریض کیمپس میں تبدیل ہوئیں، جس میں درجنوں انتظامی دفاتر، ایک اسپورٹس کمپلیکس، ایک ہسپتال، اور یہاں تک کہ رہائشی کوارٹر بھی شامل ہیں۔ اگرچہ ایک ایئر ٹائٹ سکیورٹی کورڈن سب سے زیادہ بہتر ہوتی، لیکن کمپلیکس کا مقام، ترتیب اور لاجسٹکس اسے تقریباً ناممکن بنا دیتا ہے۔

یہ کہ داخلے کے مقام پرمروت کی وجہ سے اور شاید کسی اندرونی شخص کی طرف سے کچھ مدد، چاہے کوئی اہلکارہو یا سویلین، کچھ بھی ہو سکتا ہے لیکن یہ بڑے پیمانے پر سکیورٹی کی ناکامی تھی۔ تاہم جو بات شدید پریشان کن ہے، وہ یہ ہے کہ آپریشنل سطح کی ممکنہ ناکامی پولیس کو قربانی کا بکرا بنانے کے لیے استعمال کی جا رہی ہے، جو ایک زبردست تذویراتی تباہی ہے، جس کے لیے پاکستانی فوج کی افغانستان پالیسی، اس کے جہادی پراکسیوں کے ذریعے چلائی گئی ہے۔

گزشتہ سال جون میں پاکستانی فوج کی جانب سے ٹی ٹی پی کی قیادت کے ساتھ معاہدہ ختم کرنے کے بعد سے، کے پی اور صوبہ بلوچستان کے پشتون علاقوں میں، خاص طور پر شہری قانون نافذ کرنے والے اداروں کے خلاف، دہشت گردانہ حملوں میں نمایاں اضافہ ہوا ہے۔ یہ بظاہر جنگ بندی کا معاہدہ تھا، جس میں فوج نے درحقیقت ٹی ٹی پی کے ہزاروں افراد کو ان کے اہل خانہ سمیت وطن واپس لانے، اس کے متعدد افراد کو رہا کرنے اور اس کے کیڈرز کے کئی سالوں میں ہونے والے جانی و مالی نقصانات کا معاوضہ دینے پر رضامندی ظاہر کی تھی۔

ایک چونکا دینے والے انکشاف میں ٹی ٹی پی کے سربراہ نور ولی محسود نے دعویٰ کیا ہے کہ ان کے مذاکرات کرنے والے، سابق ڈائریکٹر جنرل انٹر سروسز انٹیلی جنس (ڈی جی آئی ایس آئی) لیفٹیننٹ جنرل فیض حمید چوہدری نے سابق وفاق کے زیر انتظام علاقوں (فاٹا) کے کے پی کے ساتھ انضمام کو واپس لینے کے لیے ٹی ٹی پی کے مطالبے کو تسلیم کر لیا تھا۔ محسود نے ایک صحافی کو بتایا کہ وہ حیران ہیں کہ جنرل نے کتنی آسانی سے مطالبہ مان لیا۔

کہا جاتا ہے کہ ٹی ٹی پی ذمہ دار نے جنرل فیض، جو اس وقت پشاورمیں کورالیون کی کمان کر رہے تھے، سے پوچھا تھا، کہ وہ اس وعدے پر کیسے پورا اتریں گے، خاص طور پر جب اس تبدیلی کا سخت مقابلہ کیا جائے گا۔ جنرل فیض نے بظاہر جواب دیا تھا کہ وہ اسے ہٹا دیں گے کیونکہ وہ اگلے آرمی چیف ہوں گے۔

جنرل فیض ایک پرجوش آدمی تھے لیکن ٹی ٹی پی کے ساتھ مذاکرات کو چیف آف آرمی سٹاف (COAS) جنرل قمر جاوید باجوہ اور جنرل سٹاف کی مکمل حمایت حاصل تھی۔ دونوں آدمی تب سے ریٹائر ہو چکے ہیں۔

تاہم یہ بات چیت فوج کی ایک بڑے کے طور پر، برداشت کرنے والے، کبھی کبھار لڑنے والے اور اکثر ٹی ٹی پی سمیت مختلف جہادیوں کے ساتھ مذاکرات کرنے والے سلسلہ کی طویل تاریخ کے مطابق تھی۔ 2004ء میں شکئی معاہدے سے ہونے والی شروعات سے فوج نے کئی سالوں میں ٹی ٹی پی اور اس کے سابقہ اور اس سے وابستہ افراد کے ساتھ کم از کم 19 تحریری اور غیر تحریری معاہدے کیے ہیں۔ وائے افسوس ہر معاہدے نے بیک فائر کیا ہے۔ جہادیوں نے ہمیشہ اپنے وعدوں سے انکار کیا ہے اور جنگ بندی کے ذریعے حاصل ہونے والی مہلت کو دوبارہ منظم ہونے، بھرتی کرنے اور انتقامی کارروائی کے لیے استعمال کیا ہے۔ ہر ڈیل کے بعد ٹی ٹی پی کو زبردست فائدہ ہوا ہے۔

فیض جیسے جرنیلوں سے مذاکرات کی میز پر بیٹھ کر ٹی ٹی پی رہنما اپنے جہادی گروہوں میں اپنا وقار بڑھاتے ہیں، پاکستانی ریاست کو کمزور دکھاتے ہیں، اور آبادی اور شہری قانون نافذ کرنے والے اداروں کو یہ پیغام دیتے ہیں کہ وہ یہاں رہنے کے لیے ہیں اور ان سے ڈرنا چاہیے۔ انہوں نے حقیقت میں کبھی بھی ہتھیار ڈالنے کے دستاویز پر دستخط نہیں کیے اور تقریباً ہمیشہ فوج سے معاوضہ اور جوانوں کی رہائی سمیت دیگر رعایتیں حاصل کی ہیں۔ اس کے بعد ہمیشہ ٹی ٹی پی نے نقدی اور کیڈرز سے بھرپور اپنے فوائد کو مستحکم کرتے ہوئے اپنی موجودگی کے خلاف مزاحمت کرنے والے مقامی رہنماؤں اور قابل ذکر لوگوں اور پولیس کی سرکوبی کی ہے، جنہیں وہ اپنے راستے میں بڑی رکاوٹ کے طور پر دیکھتے ہیں۔ پولیس اپنی طرف سے کبھی بھی ٹی ٹی پی کے ساتھ بات چیت میں براہ راست فریق نہیں رہی اور فوج کی طرف سے پیدا کردہ اسٹریٹجک اسموگ میں کام کرتی ہے۔

پولیس والے اکثر نہیں جانتے کہ ٹی ٹی پی سے لڑنا ہے یا سہولت کاری کرنی ہے۔

ٹی ٹی پی کے ساتھ جنگ بندی کے بعد کے مہینوں میں، خاص طور پر ضم شدہ سابق فاٹا اور کے پی کے جنوبی اضلاع میں اکثر فوج اور اس کے انٹیلی جنس کارندوں کی جانب سے پولیس کو کہا جاتا رہا ہے کہ وہ آسانی پیدا کریں یا ٹی ٹی پی والوں کو محفوظ راستہ دیں، جن کی وطن واپسی اور بحالی کا عمل جاری تھا۔ یہ ایک بار پھر پچھلی دو دہائیوں کا نمونہ ہے، جہاں فوج نے اپنے پسندیدہ جہادیوں کو تحفظ فراہم کیا اور ان کو فعال بنایا۔ ایک حیران کن پولیس فورس، جسے سیاسی قیادت کی طرف سے کوئی رہنمائی حاصل نہیں ہوتی اور فوج کی حرکات سے ملے جلے پیغامات ملتے ہیں، وہ سخت جنگی تربیت یافتہ دشمن کے خلاف شاید ہی کارگر ثابت ہو۔

اس کا مجموعی اثر یہ ہے کہ حوصلہ مند طالبان کو شے ملتی ہے کہ انہوں نے فوج کے ساتھ جو بھی معاہدہ کیا ہے اسے توڑ دیں اور دہشت کا راج قائم کر دیں۔ یہ وقت بھی پچھلے ادوار سے مختلف نہیں تھا، ٹی ٹی پی نے گزشتہ سال نومبر میں جنگ بندی ختم کر دی تھی۔ اس کے بعد سے اس نے تقریباً روزانہ حملے شروع کیے ہیں اور یہاں تک کہ کے پی کی سبکدوش ہونے والی طالبان دوست پاکستان تحریک انصاف (پی ٹی آئی) حکومت کے وزرا سے بھی بھتہ لینا شروع کر دیا ہے۔

ٹی ٹی پی کی حکمت عملی اورطریقہ کار بالکل واضح ہے۔ پچھلی دو دہائیوں کے برعکس،جب اس نے مالاکنڈ یا وزیرستان کے بڑے علاقوں کو اپنے کنٹرول میں لیا، اس بار اس کے پاس ایسا کوئی علاقہ نہیں ہے کہ وہ جہاں سے حملہ کرے۔ یہ اپنے حملوں کو انجام دینے کے لیے ہٹ اینڈ رن گوریلا حکمت عملی اور دہشت گردی کے خلیوں پر انحصار کر ررہے ہیں۔ اپنے برادر افغان طالبان سے ایک صفحہ مستعار لے کر، ٹی ٹی پی نے شہریوں اور عوامی مقامات پر حملوں سے دوری اختیار کی اور سکیورٹی فورسز اور تنصیبات پر حملوں کا دعویٰ کیا۔

تاہم موجودہ حملے نے ایک مخمصہ پیدا کر دیا کیونکہ اس نے ایک مسجد پر حملہ کیا، لیکن ہدف پولیس تھی۔ ٹی ٹی پی نے اس کی ذمہ داری نہ لینے کا انتخاب کیا اور اسے واقعی اس کی ضرورت نہیں تھی۔ تمام اشارے اس کی شمولیت کی طرف اشارہ کرتے ہیں۔ آنے والے مہینوں میں ٹی ٹی پی کی جانب سے ریاست کو مذاکرات کی میز پر واپس لانے کی کوشش میں اپنے شیطانی حملوں میں اضافہ کرنے کا امکان ہے اور وہ اس سے علاقائی رعایت حاصل کرنے کی کوشش کرے گی۔

تاہم، اہم سوال ٹی ٹی پی کے مقابلے پاکستانی فوج کے حساب کتاب کے بارے میں ہے۔ یہ کیوں ٹی ٹی پی کو خوش کرتے ہیں اور اسے معاہدے توڑتے رہتے ہیں، جو ہمیشہ بڑے پیمانے پر خون آلود آفات پر منتج ہوتے ہیں؟

فوجی کی یہ شرط تھی کہ افغانستان میں بھارت دوست قرار دی گئی حکومت کو گرانے کے بعد افغان طالبان یا تو ٹی ٹی پی قیادت کو روکیں گے یا اسے پلیٹ میں رکھ کر پاکستان کے حوالے کر دیں گے۔ تمام شواہد کے برعکس فوجی قیادت نے تاریخی طور پر اچھے اور برے طالبان کی ایک خودساختہ تفریق قائم رکھی، نام نہاد اچھے طالبان، یعنی امریکیوں اور سابق افغان حکومت پر حملہ کرنے والے اور بظاہر برے طالبان، جن میں سے ایک ٹی ٹی پی ہے، جنہوں نے پاکستان پر حملہ کیا۔

پاکستانی فوج کے لیے یہ زیادہ اہم تھا کہ وہ کمزور افغان جمہوریہ سے چھٹکارا حاصل کر ے، جو بھارت اور پاکستان میں پشتون اور بلوچ قوم پرستوں کے لیے دوستانہ رویہ رکھتی تھی اور افغان طالبان اس کی کامیابی کا ٹکٹ تھے۔ یہ کہ افغان طالبان اور ٹی ٹی پی ایک سطح پر اکٹھے ہو گئے، فوج کے لیے قطعی طور پر نقصان نہیں ہوا، لیکن اس نے ٹی ٹی پی کے ساتھ کاروبارکرنے کی قیمت، جو موت اور تباہی کی صورت میں تھی، کو موثر سمجھا اور برداشت کرنے پر غور کیا۔تاہم امارت اسلامیہ افغانستان (IEA) کے قیام کے بعد افغان طالبان نے اپنے نظریاتی بھائیوں کے خلاف کارروائی کرنے سے انکار کر دیا جنہوں نے ان کے ساتھ روٹی اور بنکر بھی بانٹ رکھے تھے۔

درحقیقت کابل پر قبضہ کرنے کے بعد افغان طالبان نے ٹی ٹی پی کے ہزاروں جنگجوؤں اور کئی اہم رہنماؤں کو گرنے والی حکومت کی جیلوں سے باہر نکالا۔ اب پاکستانی قیادت نے ٹی ٹی پی کے ساتھ براۂ راست مذاکرات نہ کرنے کا عہد کیا ہے اور اعلان کیا ہے کہ وہ صرف امارات اسلامی افغانستان سے بات کریں گے۔ طالبان کے وزیر خارجہ نے پاکستان کے ان الزامات کی تردید کی ہے کہ حملہ افغان سرزمین سے کیا گیا تھا اور پاکستان سے کہا ہے کہ وہ اپنا جائزہ لے۔ ٹی ٹی پی کے ہزاروں کیڈرز کے واپس پاکستان منتقل ہونے کے بعد، امارات اسلامی افغانستان اب اسی طرح کی تردیدہی افورڈ کرتا ہے جو پاکستان اس وقت کرتا تھا، جب اس نے افغان طالبان کو پناہ دی تھی۔ افغان طالبان کی جانب سے نظریاتی وجوہات کی بنا پر نہیں بلکہ عملی وجوہات کی بنا پر اپنے ٹی ٹی پی بھائیوں کے خلاف فیصلہ کن کارروائی کرنے کا بہت زیادہ امکان موجود نہیں ہے۔ امارات اسلامی افغانستان کو اسلامک اسٹیٹ ان خراسان (ISIK) کی طرف سے نظریاتی اور میدان جنگ دونوں چیلنج کا سامنا ہے۔

افغانستان میں آباد پاکستانی طالبان کی قیادت پر سختی کو امارات اسلامی افغانستان اور ٹی ٹی پی کے کیڈرز کی طرف سے ایک نظریاتی نظر ثانی کے طور پر دیکھا جا سکتا ہے اور یہ عمل کچھ جنگجوؤں کو ’ISIK‘ کی طرف دھکیل سکتا ہے۔ پاکستان افغان طالبان کو صرف اتنا ہی دھکیل سکتا ہے۔ امارات اسلامی افغانستان سفارتی حمایت سمیت بہت کچھ کے لیے پاکستان پر انحصار کرتا ہے۔ تاہم 1996-2001ء کی بین الاقوامی سطح پر الگ تھلگ امارات کے برعکس، جس نے اسامہ بن لادن کو پناہ دی تھی، افغان طالبان کے پاس اب خلیجی ممالک، چین اور یہاں تک کہ بھارت سمیت کئی ممالک کے لیے براۂ راست چینل کھلے ہیں۔ دوسری طرف پاکستانی فوج کا افغانستان میں طالبان کے علاوہ کوئی اور اتحادی نہیں ہے۔

اس نے اپنے تمام انڈے افغان طالبان کی ٹوکری میں ڈال دیے تھے اور اپنی دہائیوں سے جاری تذویراتی گہرائی کی پالیسی کو برقرار رکھنے کے لیے خصوصی طور پر امارات اسلامی افغانستان پر انحصار کرتا ہے۔ یہ ان اہم وجوہات میں سے ایک ہے، جس کی وجہ سے فوج نے صرف بیک فائر دیکھنے کیلئے ٹی ٹی پی کے ساتھ مشغول ہونے کی کوشش کی، جیسا کہ پیشین گوئی کی گئی تھی۔

تاہم مسئلہ یہ ہے کہ دسیوں ہزار پاکستانی جانوں کے ضیاع کے باوجود، جن میں سے زیادہ تر نسلی پشتون اور مذہبی اقلیتیں ہیں، فوجی قیادت اپنے گریبان میں جھانکنے سے انکاری ہے۔ وہ یہ تسلیم کرنے سے انکاری ہے کہ اس کے جہادی منصوبے مکمل طور پر تباہی کا موجب بنے ہیں، جس میں کئی اہلکار بھی مارے گئے ہیں۔ اس سخت تردید میں (فوجی) جنتا کے ساتھ مرکزی دھارے کی سیاسی جماعتیں بھی شامل رہی ہیں۔ مثال کے طور پر بظاہر لبرل پاکستان پیپلز پارٹی (پی پی پی) کے چیئرمین اور ملک کے موجودہ وزیر خارجہ بلاول بھٹو زرداری نے افغان طالبان کو ایک ایسی حقیقت قرار دیا تھا جس کے ساتھ کام کرنا چاہیے، لیکن ٹی ٹی پی کو فتنہ قرار دیا، جو کہ جھگڑے اور تنازعہ سے متعلق ایک اسلامی اصطلاح ہے۔ پی ٹی آئی کے سربراہ اور اہم اپوزیشن لیڈر عمران خان طالبان کے ایک غیرمتزلزل حمایتی رہے ہیں، جنہوں نے طالبان کے ہاتھوں کابل کے سقوط کا یہ اعلان کر کے جشن منایا تھا کہ افغانوں نے (مغربی) غلامی کا طوق توڑ دیا ہے۔

اسی طرح حکمران جماعت پاکستان مسلم لیگ نواز (پی ایم ایل این) کے رہنما اور پاکستان کے موجودہ وزیر دفاع خواجہ محمد آصف نے دوحہ معاہدے کے بعد طالبان کی تعریف کی تھی کہ مغرب کے پاس دنیاوی طاقت ہو سکتی ہے لیکن خدائی طاقتیں ان کے ساتھ ہیں۔ پاکستان میں فوجی اور سول منتر ایہ تھا کہ افغان جمہوریہ ٹی ٹی پی کو پناہ دے رہی ہے اور حکومت کے بھارتی سرپرست اسے تربیت دے رہے ہیں اور مسلح کر رہے ہیں۔

اب جب کہ پاکستان دوست امارات اسلامی افغانستان کابل میں حکومت کر رہی ہے، انہی خواجہ آصف کو ایک ٹیلی ویژن شو میں یہ کہنے پر مجبور کیا گیا کہ بھارت ٹی ٹی پی کی رہنمائی کر رہا ہے اور انہیں (میدان جنگ کے) مینول دے رہے ہیں۔ فوجی اور سویلین جھڑپیں جاری ہیں اور ٹی ٹی پی کے خلاف ایک اور آپریشن کے بارے میں بھی بات ہو رہی ہے۔

پولیس لائنز کے حملے سے پہلے ہی پاکستانی حکام نے افغان سرزمین پر ٹی ٹی پی کے کیمپوں کے خلاف ایک اور فضائی حملے کی تجویز دی تھی اور کچھ تجزیہ کاروں نے افغانستان کے اندر بفر زون بنانے کا بھی مشورہ دیا تھا، جیسا کہ ترکی نے شام میں کردوں کے خلاف کیا تھا۔ پچھلے سال ہونے والے فضائی حملوں میں درحقیقت عام شہری مارے گئے تھے اور امارات اسلامی افغانستان کی طرف سے احتجاج کیا گیا تھا۔ ٹی ٹی پی کی قیادت کو کوئی نقصان نہیں ہوا تھا۔ کچھ پشتون قوم پرست رہنماؤں نے الزام لگایا ہے کہ فوج امریکی سرپرستی حاصل کر کے دہشت گردی کے اس نئے دور، جو زیادہ تر اس کی اپنی بنائی ہوئی ہے، کو ڈالر کمانے کے ایک اور کاروبار میں استعمال کرنا چاہتی ہے۔

حقیقت یہ ہے کہ چاہے وہ ٹی ٹی پی ہو، داعش خراسان ہو یا امارات اسلامی افغانستان، وہ سب اس جہادی ایکو سسٹم میں زندہ اور پروان چڑھتے ہیں، جسے پاکستانی فوج نے بنایا اور برقرار رکھا ہے اور جب تک اس کو پیچھے ہٹانے کی کوشش نہیں کی جاتی، ایسا نہیں ہو سکتاکہ دہشت گردی کے خطرے کا پائیدار حل نکل سکے۔ پاکستان کی معیشت شدید مشکلات سے دوچار ہے، ایسا لگتا ہے کہ فوج کی فوری حکمت عملی کم لاگت، کم شدت کی انسداد دہشت گردی کی کارروائیاں کر کے ٹی ٹی پی کو سابق فاٹا کے علاقوں تک محدود رکھنا ہے۔ بدقسمتی سے پاکستان کی تین بڑی سیاسی جماعتیں فوج کی افغانستان پالیسی کوہی زیادہ تراپناتی ہیں۔

اگر وہ ایسا نہیں بھی کرتے ہیں تو وہ اس پالیسی پر (فوجی) جنتا کو ذمہ دار ٹھہرانے سے بھی کتراتے ہیں۔ پشتون علاقے جہادی دہشت گردی سے سب سے زیادہ متاثر ہوئے ہیں، لیکن عظیم انتخابی اسکیم میں ان کی کوئی اہمیت نہیں ہے۔ سب سے بڑی تین سیاسی جماعتوں میں سے پی ٹی آئی کے پاس صوبہ کے پی میں سب سے زیادہ انتخابی حصہ ہے، لیکن اس کی قیادت ایک شخص کر رہا ہے، جسے طالبان خان کہا جاتا ہے۔ پنجاب اور سندھ بالترتیب مسلم لیگ ن اور پی پی پی کے گڑھ اور بنیادی توجہ کا مرکز بنے ہوئے ہیں۔

روایتی پشتون قوم پرست جماعتیں کئی سالوں میں مختلف وجوہات کی بنا پر کمزور اور کنارہ کشی کا شکار رہی ہیں۔ پشتون تحفظ موومنٹ (PTM) اور نو تشکیل شدہ نیشنل ڈیموکریٹک موومنٹ (NDM) سب سے مضبوط ترقی پسند پشتون آوازیں ہیں، بشمول پارلیمنٹ میں، لیکن عددی طور پر اتنی مضبوط نہیں ہیں کہ پالیسی میں تبدیلی لا سکیں۔

لیکن ٹی ٹی پی کے اضافے کے بعد سے سوات سے لے کر جنوبی وزیرستان تک پشتون علاقوں میں بے ساختہ عوامی مظاہرے ہوئے ہیں، جن میں فوج کی اچھے/برے طالبان پالیسی کو ختم کرنے اور ٹی ٹی پی کیڈرز کی بے دخلی کا مطالبہ کیا گیا ہے۔ تقریباً تمام سیاسی جماعتوں کی مقامی قیادت نے ان مظاہروں میں شمولیت اختیار کی، جسے پشتو میں اولسی پاسون (عوام کی بغاوت) کہا جاتا ہے، لیکن مرکزی قیادت عملی طور پر غائب تھی۔

تاہم پشاور میں مسجد میں ہونے والے بم دھماکے کے بعد ہونے والے پولیس کے مظاہروں کے بعد سے وہ رہنما زیادہ دیر تک اس سب سے کنارہ کش نہیں رہ سکتے۔ ایک بے مثال اقدام میں سینکڑوں پولیس افسران اور جوان دہشت گردی کے خلاف مظاہرے کے لیے سڑکوں پر نکل آئے۔ انہوں نے پولیس کو بااختیار بنانے اور دہشت گردی کے خلاف واضح موقف پر زور دیا۔

حملے کے بعد پولیس فورس حیران، غمگین اور برہم تھی۔ رینک اینڈ فائلز سے لے کر بڑے پیمانے پر استعفوں کی کالیں آئیں، لیکن آخر کار انہوں نے سڑکوں پر آنے کا فیصلہ کیا اور جو نعرے انہوں نے لگائے، وہ وہی تھے جو پی ٹی ایم، این ڈی ایم اور فوج کی جہادی پالیسیوں کے دوسرے ناقدین لگاتے آ رہے ہیں۔ سب سے عام نعرہ یہ تھا کہ ”یہ جو نامعلوم ہیں، یہ ہمیں معلوم ہیں“، جو فوج کے جہادی حامیوں کا ایک باریک پردہ دار حوالہ ہے۔ ایک ایسے ملک میں، جہاں پولیس کی آخری ہڑتال 1970ء کی دہائی میں ہوئی تھی، کے پی پولیس کا عوامی سطح پر احتجاج اور عملی طور پر فوج پر پشاور میں خونریزی کا الزام لگانا ایک بہت اہم پیش رفت ہے۔

پاکستان کی سیاسی قیادت عوام اور پولیس کی اس ناراضگی کونظر انداز کر کے خود کو خطرے میں ڈالے گی۔

کارٹون: بشکریہ فرائیڈے ٹائمز