استاد دامن مرحوم
بھاگاں والیو! باقی دیاں چھڈو! خبراں اچوں خبر تے برکینا فاسو دی اے۔
اَسی پنجابی دے شاعر تے کوی بارہ ماہ لکھدے رہے۔ برکینا فاسو دیاں منڈیاں اٹھ ماہ بعد دوجی واری مارشل لا لا دتا۔ میرے بیلی تے متر منٹو نے خبر پڑھی تے بھجدا بھجدا میرے کول آیا۔بوہا کھولدیاں ای نعرہ ماریا:
استاد جی! برکینا فاسو دے منڈے بازی لے گئے!!!
مینوں ایہہ خبر منٹو نے ای پچائی۔ منٹو دسیا پئی کیپٹن ابراہیم ٹراوے نے لیفٹنٹ کرنل پال ہینری سانڈو گودامیبا دی فوجی حکومت دی تھاں اپنا نواں مارشل لا دتا۔
”ایتھے رکھ کپتانا!“ منٹو نے فیرنعرہ ماریا تے ہس ہس دوہرا ہو گیا۔
کپتان نے کرنیل نوں کرسی توں ہٹا دتا؟ میرے لئی نوی جیہی گل سی۔ میں منٹونوں آکھیا: ”یار منٹو! ساہڈے کپتان تے وچارے کرنیل دا بیٹ مین نئیں ہٹا سکدے۔ برکینا فاسو دے منڈے واقعی بازی لے گئے جے۔ اوہناں دے کپتان نے پورا ثابت کرنیل ہٹا دتا۔بلے وئی بلے“۔
کپتان دا اکھر سنیا تے منٹو فیر ہسن لگ پیا۔ آکھدا اے ”استاد جی! تکو برکینا فاسو اِچ وی کپتان ای انقلاب لے کے آیا جے۔ پر رب خیر کرے۔ برکینا فاسو دا کپتان وی کدھر ے نواں برکینا فاسو بنان نہ ٹُر پوے۔ ساہنوں تے امریکہ کنک گھل دینی اے۔برکینا فاسو کول تے امریکہ وی نئیں ہیگا“۔
میں منٹو نوں آکھیا: ”منٹو تیری گل وی ٹھیک اے۔ پر میں ایہہ سوچ رہیا واں پئی ساہڈے باجوہ صاب برکینا فاسو دیاں خبراں سن کے کیہڑیاں سوچاں پئے ہوون گے۔“
منٹو فیر ہسیا۔ ”استاد جی! باجوہ صاب ہوری خبراں نئیں سندے۔ اوہ تڑکے ویلے جی ایچ کیو جان لئی شیو کرن لگیاں اِک یوٹیوبر دا ویلاگ سندے نیں“۔
